AUSENCIA DE FUTURO
AUSENCIA DE FUTURO.
A tarde foi caendo tra-los
muros de pedra escura pintados en lama e toxos.
Os Bidueiros de
xunto o río deixaban unha tibia silueta en sombra sobre a herba mollada cun fino orballo e mais
alá a espesura da fraga saudaba cun doce
rumor de polas marelas, o agarimo do vento nordés. O Indalecio fórase perdendo
trala liña parda do horizonte, levándose os seus recordos, as dores de corpo e
alma, a escuridade dos ollos, a perda da
ilusións e a esperanza que inventaba o amor, porta pechada na
inquedanza da morte en calma .
Eu alí sentado,
ollaba cara ningures incapaz de moverme.Vencido por un infinito cansazo, me
sentín coma atrapado por un voraz burato negro do firmamento e así
debagando recordei unha e outra vez as súas palabras tristes, a súa voz cálida
cun movemento canso de cabeza, a súa faciana chea de engurras, a boina negra de
orixe de graxa e merda acumulada en días e días de non quitárela da
cachoa, calada ata as orellas, a
inesgotable cabicha do cigarro pegada no borde dereito dos beizos, pola que cuspia de cando en vez sen
saliva, coma un tic .Ia recordar sempre aquel vello o ultimo en deixar a aldea
e a súa historia de vida.
Dos oito fillos que
o Indalecio xerou coa súa semente de home ruín e xenerosamente rifón que sempre
foi, no ventre da señora Virtudes, so quedaban vivos a metade e ningún deles
tiña acomodo na aldea durmida no silencio. Xa que nos tempos da fame marcharan
un tralo outro para a capital e os mais deles continuaran viaxe cara as
Américas, de onde nunca mais regresaron.
Ao principio, contoume
ali sentados ambolodous, tiveramos novas deles. Das súas andainas e estadías
alá na Pampa Arxentina, que segundo referían nas poucas cartas que de cando en
vez chegaban e que lles lía o Sr. Antón, mestre retirado, semellaba as terras
de Castela, onde de novos fora segar o trigo cos demais mozos da zona, pero
en bruto.
Pouco a pouco
deixaran ter correspondencia e o tempo foise encargando de que os de alén do
mar, quedaran para sempre alá e sen que ninguén soubese se ben ou mal. Nin
falta que facía, segundo o Indalecio, cando me sacaba de pasada na conversa o tema, nas tardes de choiva e frío
co vento arrizando contra as portas e ventás na escuridade de dentro e fora, e
na lareira fumeaba o pote co caldo de verza e unto, se escaso cun anaco de
touciño, para dar cheirume, dunha matanza vella da que aínda quedara algo na
corte entre as teas de araña e os ratos, os únicos que de certo no ían marchar
da aldea .
Do Indalecio
aprendín que a vida é para vivila, que non paga a pena amolarse nas desgrazas,
que o peor dos pecados é a envexa e o odio e que no amor vale todo e hai que
facer as cousas da vida con amor.
O recordo camiñando
polas rúas en pedra mollada da aldea baleira, acompañado do seu can tiñoso e
famélico que nunca ladraba a ninguén, arrastrando os pes e a chaqueta de pana a cadros coas sarnas nos cóbados do traxe parcheadas e
os puños brillantes fora inverno ou verao. E a súa risa a gargalladas cando me
contaba as súas aventuras desta vida real ou inventada xa esquecida, os dous
sos alí sentado baixo o carballo a carón da
fonte xa seca.
ANGEL UTRERA.
(Artigo no Faro de Vigo do Domingo dia 16 de Marzo).-As fotos forman parte da coleccion "NA MIÑA BICICLETA", a primeira exposicion que presentei fai catro anos.
Comentarios